ఫ్రాన్స్లో జీవన వ్యయాలు పెరగడం, ప్రభుత్వ సేవల్లో కోతలు, విద్యా వ్యవస్థలో సమస్యలకు వ్యతిరేకంగా జరిగిన నిరసనలు తీవ్ర హింసకు దారితీశాయి. శనివారం దేశవ్యాప్తంగా జరిగిన ఆందోళనల్లో కొన్ని చోట్ల నిరసనకారులు పోలీసులతో ఘర్షణకు దిగారు. దుకాణాలను ధ్వంసం చేయడం, వస్తువులను దోచుకోవడం, ప్రభుత్వ భవనాలకు నిప్పంటించడం వంటి ఘటనలు చోటుచేసుకున్నాయి.
లిమోజ్ నగరంలో సుమారు 143 ఏళ్ల చరిత్ర కలిగిన నగరపాలక భవనం అగ్నికి ఆహుతైంది. పారిస్, మార్సెయి, లియోన్ వంటి ప్రధాన నగరాల్లోనూ నిరసనలు హింసాత్మకంగా మారాయి. పారిస్లో వందలాది వ్యాపార సంస్థలు ధ్వంసమైనట్లు స్థానిక వాణిజ్య ప్రతినిధులు వెల్లడించారు. విలాసవంతమైన వస్తువుల దుకాణాలు లక్ష్యంగా మారగా, మార్సెయిలో ఫుట్బాల్ క్లబ్ ఒలింపిక్ డి మార్సెయి అధికారిక దుకాణాన్ని కూడా దోచుకున్నారు.
హింసాత్మక ఘటనల నేపథ్యంలో దేశవ్యాప్తంగా వేలాది మందిని పోలీసులు అదుపులోకి తీసుకున్నారు. నాటికి సుమారు 2,400 మందిని అరెస్టు చేసినట్లు అంతర్జాతీయ వార్తా సంస్థలు నివేదించాయి. వందలాది మంది పోలీసు సిబ్బంది గాయపడినట్లు అధికారులు తెలిపారు. శనివారం సుమారు 60 వేల మంది పోలీసు, భద్రతా సిబ్బందిని విధుల్లో నియమించినప్పటికీ కొన్ని నగరాల్లో పరిస్థితిని అదుపులోకి తీసుకురావడం కష్టమైందని అంతర్గత వ్యవహారాల మంత్రి లారెంట్ నునెజ్ అంగీకరించారు.
పారిస్, మార్సెయి, లియోన్ నగరాల మేయర్లు నిరసనల సమయంలో భద్రతా ఏర్పాట్లు సరిపోలేదని ప్రభుత్వంపై విమర్శలు చేశారు. నగరాల్లోని కొన్ని ప్రాంతాలకు తగిన రక్షణ లభించలేదని వారు పేర్కొన్నారు. నిరసనల తీవ్రతను ముందుగానే అంచనా వేయడంలో నిఘా వ్యవస్థలు, భద్రతా విభాగాలు విఫలమయ్యాయా అనే అంశంపై చర్చ మొదలైంది.
అంతర్గత వ్యవహారాల మంత్రి నునెజ్ తన పదవికి రాజీనామా చేసేందుకు ముందుకు వచ్చినప్పటికీ అధ్యక్షుడు ఇమ్మాన్యుయేల్ మాక్రాన్ దాన్ని తిరస్కరించారు. హింసను అరికట్టేందుకు కొత్త చర్యలు చేపట్టాలని, భద్రతా వైఫల్యాలపై స్పష్టత ఇవ్వాలని ఆయన ఆదేశించారు.
విద్యాసంస్థల్లో సిబ్బంది కొరత, విద్యార్థులకు సరైన సౌకర్యాలు లేకపోవడం వంటి సమస్యలతో మొదలైన ఆందోళనలు క్రమంగా విస్తృత నిరసనలుగా మారాయి. పెరుగుతున్న జీవన వ్యయాలు, ఇంధన ధరలు, ప్రభుత్వ ఖర్చుల తగ్గింపు చర్యలు, ప్రజా సేవల నాణ్యతపై అసంతృప్తి కూడా ఉద్యమానికి కారణమయ్యాయి. అయితే, శాంతియుతంగా నిరసన తెలిపిన వారందరినీ హింసాత్మక ఘటనలకు బాధ్యులుగా చూడలేమని నిరసనకారుల తరఫున పలువురు పేర్కొన్నారు.
ఫ్రాన్స్లో అధ్యక్ష ఎన్నికలకు సుమారు ఆరు నెలల ముందు ఈ పరిణామాలు చోటుచేసుకోవడంతో ప్రభుత్వంపై రాజకీయ ఒత్తిడి పెరిగింది. దేశవ్యాప్తంగా మరిన్ని సమ్మెలు, నిరసనలకు కార్మిక సంఘాలు పిలుపునిచ్చాయి. పరిస్థితిని అదుపులోకి తీసుకురావడం, ప్రజల ఆందోళనలకు పరిష్కారాలు చూపడం ఇప్పుడు ఫ్రాన్స్ ప్రభుత్వానికి కీలక సవాలుగా మారింది.