సౌదీ అరేబియాలో మరణశిక్షను ఎదుర్కొంటున్న శ్రీలంకకు చెందిన హిందూ యువకుడు అనోజన్ శివరాసకు భారీ ఊరట లభించింది. ఆయనకు విధించిన మరణశిక్షను సౌదీ అరేబియా సుప్రీంకోర్టు రద్దు చేసింది. ఈ విషయాన్ని శ్రీలంక విదేశాంగ మంత్రిత్వ శాఖ ధ్రువీకరించింది.
24 ఏళ్ల అనోజన్ శివరాస శ్రీలంకకు చెందిన వలస కార్మికుడు. శ్రీలంకలో జరిగిన ఒక ఘటనకు సంబంధించిన వీడియో సామాజిక మాధ్యమాల్లో వ్యాప్తి చెందడంతో మతపరమైన చర్చ మొదలైంది. ఆన్లైన్ వాదనల సమయంలో ఒక వినియోగదారు హిందూ దేవతపై అభ్యంతరకర వ్యాఖ్య చేసినట్లు సమాచారం. దీనికి స్పందిస్తూ అనోజన్ తమిళంలో ఇస్లాం మతం, ప్రవక్త మహమ్మద్కు సంబంధించి అభ్యంతరకర వ్యాఖ్య చేశాడని ఆరోపణలు వచ్చాయి.
అనోజన్ ఆ వ్యాఖ్యను కొద్దిసేపటికే తొలగించి, క్షమాపణ కోరుతూ వీడియో కూడా విడుదల చేసినట్లు కథనాలు పేర్కొన్నాయి. అయితే, అప్పటికే ఆ వ్యాఖ్యకు సంబంధించిన చిత్రాలు ఇతరులకు చేరాయి. ఈ వ్యవహారం సౌదీ అరేబియాలో ఆయన పనిచేస్తున్న సంస్థ దృష్టికి వెళ్లడంతో అధికారులు కేసు నమోదు చేశారు.
శిక్షల తీరు
ఈ కేసులో తొలుత అల్ అహ్సా క్రిమినల్ కోర్టు అనోజన్కు ఐదేళ్ల జైలు శిక్షతో పాటు మూడు మిలియన్ల సౌదీ రియాల్స్ జరిమానా విధించింది. అనంతరం అప్పీల్ కోర్టులో శిక్ష మరణశిక్షగా మారింది. దీంతో ఆయన కుటుంబం తీవ్ర ఆందోళనకు గురైంది.
అనోజన్ను రక్షించేందుకు శ్రీలంక ప్రభుత్వం దౌత్యపరమైన చర్యలు తీసుకుంది. ఆయన కుటుంబ సభ్యులు, రాజకీయ నాయకులు, వివిధ మత పెద్దలు కూడా క్షమాభిక్ష కల్పించాలని విజ్ఞప్తులు చేశారు. న్యాయపరమైన చర్యల్లో భాగంగా న సౌదీ సుప్రీంకోర్టులో అప్పీల్ దాఖలైనట్లు నివేదికలు తెలిపాయి.
తాజాగా, సుప్రీంకోర్టు మరణశిక్షను రద్దు చేయడంతో అనోజన్ కుటుంబానికి ఊరట లభించింది. అయితే, ఈ నిర్ణయం తర్వాత ఆయనపై తదుపరి న్యాయపరమైన చర్యలు, విడుదలకు సంబంధించిన ప్రక్రియ వంటి వివరాలు ఇంకా స్పష్టంగా తెలియాల్సి ఉంది.
