అరాచకాలతో గెలిచినా అది గెలుపు కాదు ప్రజల మనసు గెలుచుకున్న వైఎస్సార్సీపీదే అసలైన విజయం

స్థానిక మున్సిపల్ ఎన్నికల్లో టీడీపీ అరాచకాలకు పాల్పడినా, వైఎస్సార్సీపీ నైతికంగా విజయం సాధించిందని మాజీ మంత్రి విడదల రజిని స్పష్టం చేశారు. ఎన్నికల్లో ధైర్యంగా పోరాడిన అభ్యర్థులను ఆమె సత్కరించారు. పోలింగ్ నుంచి కౌంటింగ్ వరకు టీడీపీ నేతలు బెదిరింపులకు, దౌర్జన్యాలకు పాల్పడ్డారని ఆమె మండిపడ్డారు.

క్రౌన్ హ్యూమన్ రైట్స్, చిలకలూరిపేట: స్థానిక మున్సిపల్ ఎన్నికల్లో అధికార బలం, పోలీసు యంత్రాంగం అండతో టీడీపీ అరాచకాలకు పాల్పడినా, వైఎస్సార్సీపీ నైతికంగా ఘన విజయం సాధించిందని మాజీ మంత్రి విడదల రజిని స్పష్టం చేశారు. స్థానిక పార్టీ కార్యాలయంలో 48 వార్డుల అభ్యర్థులు, బూత్ ఏజెంట్లతో ఆమె సమీక్షా సమావేశం నిర్వహించారు. ఈ సందర్భంగా ఎన్నికల్లో ధైర్యంగా పోరాడిన అభ్యర్థులను శాలువాలతో ఘనంగా సత్కరించారు. అనంతరం ఆమె మాట్లాడుతూ పోలింగ్ ప్రారంభం నుంచి కౌంటింగ్ ముగిసే వరకు టీడీపీ నేతలు అధికార మదంతో బెదిరింపులకు, దౌర్జన్యాలకు పాల్పడ్డారని మండిపడ్డారు. గ్రామాల నుంచి రౌడీ మూకలను తీసుకొచ్చి ముస్లింలు, బీసీలు, ఎస్సీలపై దాడులు చేయించారని ఆమె ఆగ్రహం వ్యక్తం చేశారు. ఓటమి భయంతోనే టీడీపీ ఇంతటి నీచ రాజకీయాలకు ఒడిగట్టిందని ఆమె విమర్శించారు. ప్రజాస్వామ్యాన్ని ఖూనీ చేస్తూ సాధించిన విజయం గొప్పేమీ కాదని, ప్రజల మనసులు గెలుచుకున్నప్పుడే అది నిజమైన గెలుపు అవుతుందని ఆమె పేర్కొన్నారు.

చిలకలూరిపేటలో అభివృద్ధి ముసుగులో పేకాట క్లబ్బులు, అసాంఘిక కార్యకలాపాలను ప్రోత్సహిస్తున్నారని మాజీ మంత్రి విడదల రజిని ఆరోపించారు. ఒక మాజీ మంత్రి అని కూడా చూడకుండా తనను హౌస్ అరెస్ట్ చేయడంతో పాటు, ఒక ఎస్ఐ తన పట్ల దురుసుగా ప్రవర్తించారని ఆమె తీవ్ర ఆవేదన వ్యక్తం చేశారు. అధికార, పోలీసు బలగాలను ఎదుర్కొని నిలబడిన కార్యకర్తలు, ఏజెంట్ల తెగువ అభినందనీయమని ఆమె కొనియాడారు. పార్టీ కోసం కష్టకాలంలో అండగా నిలిచిన ప్రతి ఒక్కరికీ రానున్న తమ ప్రభుత్వంలో తగిన గుర్తింపు, అవకాశాలు కల్పిస్తామని ఆమె భరోసా ఇచ్చారు. అధికారం ఎవరికీ శాశ్వతం కాదని, 2029 ఎన్నికల్లో చిలకలూరిపేట ప్రజలు టీడీపీకి తగిన గుణపాఠం చెబుతారని ఆమె హెచ్చరించారు. ఈ సమావేశంలో పార్టీ పట్టణ అధ్యక్షుడు షేక్ దరియావలీ, కౌన్సిలర్లు పోతుల దీపిక, సుదర్శనం సుమలత, ఇతర ముఖ్య నాయకులు, కార్యకర్తలు పాల్గొన్నారు.