కేబీఆర్ ఫ్లైఓవర్ వ్యవహారంపై ప్రభుత్వ తీరుపై క్రౌన్ హ్యూమన్ రైట్స్ ప్రజల ఆగ్రహం

కేబీఆర్ పార్క్ పరిసరాల్లో ట్రాఫిక్ సమస్యను పరిష్కరించేందుకు గతంలో పలు ఫ్లైఓవర్లు, అండర్పాస్లతో కూడిన విస్తృత ప్రణాళికను ప్రతిపాదించారు. అయితే పార్క్ చుట్టూ వన్వే ట్రాఫిక్ విధానాన్ని అమలు చేసిన తర్వాత రద్దీ గణనీయంగా తగ్గిందని అధికారులు గుర్తించారు. దీంతో గతంలో ప్రతిపాదించిన మౌలిక వసతుల ప్రణాళికను పునఃసమీక్షించారు.

తాజా నిర్ణయం ప్రకారం జూబ్లీహిల్స్ చెక్పోస్ట్ నుంచి ఎన్ఎఫ్సీఎల్ జంక్షన్ వరకు సుమారు 4.3 కిలోమీటర్ల ఆరు లేన్ల ఎలివేటెడ్ కారిడార్ నిర్మించేందుకు ప్రణాళిక రూపొందించారు. ఈ ప్రాజెక్టును రెండు ప్యాకేజీలుగా చేపట్టనున్నారు. మొత్తం అంచనా వ్యయం రూ.1,090 కోట్లుగా అధికారులు పేర్కొన్నారు.

ఇదిలా ఉండగా, కేబీఆర్ పార్క్ పరిసరాల్లో చెట్ల తొలగింపు, పర్యావరణ ప్రభావంపై గతంలోనే పర్యావరణవేత్తలు, స్థానికులు ఆందోళనలు వ్యక్తం చేశారు. ప్రాజెక్టు పనులను వ్యతిరేకిస్తూ పలుమార్లు నిరసనలు కూడా జరిగాయి. పార్క్ పచ్చదనాన్ని కాపాడాలని, ప్రాజెక్టు వివరాలను ప్రజలకు వెల్లడించాలని నిరసనకారులు డిమాండ్ చేశారు.

ప్రస్తుతం రూపొందించిన కొత్త రూపకల్పనలో కేబీఆర్ పార్క్ పర్యావరణ సున్నిత ప్రాంతంపై ప్రభావం లేకుండా ఎలివేటెడ్ కారిడార్ను నిర్మించేలా ప్రణాళిక రూపొందించినట్లు అధికారులు చెబుతున్నారు. అలాగే భూసేకరణ, నిర్మాణ వ్యయాల్లో కలిపి సుమారు రూ.1,200 కోట్ల ప్రజాధనం ఆదా అవుతుందని అధికారులు వెల్లడించారు.

అయితే ఇప్పటికే చేపట్టిన పనులు, గత ప్రణాళికలో చేసిన ఖర్చులు, కొత్తగా మారుస్తున్న రూపకల్పనపై ప్రజలకు పూర్తి వివరాలు వెల్లడించాల్సిన అవసరం ఉందనే అభిప్రాయాలు వ్యక్తమవుతున్నాయి. ప్రభుత్వం, తీసుకునే తదుపరి నిర్ణయాలపై స్థానికులు, పర్యావరణవేత్తలు, వాహనదారులు ఆసక్తిగా ఎదురుచూస్తున్నారు.