మూడేళ్ల క్రితం ఇదే రోజున, తెల్లవారుజామున నంద్యాలలో సీనియర్ నాయకుడు నారా చంద్రబాబు నాయుడును పోలీసులు అక్రమంగా అరెస్టు చేశారు. ప్రజాస్వామ్యంపై దాడిగా అభివర్ణించిన అభిమానులు, ఐటీ నిపుణులు, వివిధ రంగాల ప్రముఖులు తీవ్ర దిగ్భ్రాంతి వ్యక్తం చేశారు. ఆయన రాజమండ్రి జైలు నుంచి విడుదలైన తర్వాత భారీ జనసందోహం మధ్య అమరావతికి చేరుకున్నారు.
ఐదు దశాబ్దాలు ప్రజలకు నిస్వార్థ సేవలు అందించిన చంద్రబాబు నాయుడును, ప్రజాస్వామ్యబద్ధంగా ప్రశ్నించే గొంతును అణచివేయాలనే కుట్రతో పోలీసు బలగాలు ఆయనను అరెస్టు చేశాయని వార్తలు వచ్చాయి. ఆ సమయంలో అప్పటి ముఖ్యమ ముఖ్యమంత్రి జగన్ దేశం వెలుపల ఉండటం, ఈ అరెస్టు వెనుక కక్షసాధింపు రాజకీయం ఉందని స్పష్టం చేసిందని పేర్కొన్నారు.
ఈ అరెస్టు ఒక రాజకీయ సునామీకి నాంది అని కుట్రదారులు ఊహించలేకపోయారని తెలిపారు.
ఉదయానికల్లా ఈ వార్త దేశవిదేశాలకు దావానలంలా పాకింది. అరెస్టు వార్త వినగానే ప్రపంచవ్యాప్తంగా ఉన్న అభిమానులు, ఐటీ నిపుణులు, ప్రముఖులు తీవ్ర దిగ్భ్రాంతికి గురయ్యారు. ఇది ప్రజాస్వామ్యంపై జరిగిన దాడి, చంద్రబాబు నాయుడు గారు ఈ అక్రమ కేసుల నుంచి కడిగిన ముత్యంలా బయటకు వస్తారు అని నినదించారు. రోడ్లన్నీ జనాందోళనలతో నిండిపోయాయి. మహిళలు, యువకులు, వృద్ధులు అని తేడా లేకుండా వేలాది మంది రహదారులపైకి వచ్చారు.
ఆయనను రాజమండ్రికి తరలిస్తుండగా ప్రజలు అడ్డుగా నిలిచారు. అయితే, వ్యవస్థలపై గౌరవంతో చంద్రబాబు నాయుడు గారు ప్రజలకు చేతులు జోడించి, న్యాయవ్యవస్థపై నమ్మకంతో సంయమనం పాటించండి అని సందేశమిస్తూ చట్టానికి పూర్తిగా సహకరించారు.
ఆ తర్వాత జరిగింది చరిత్ర. అక్రమ అరెస్టుతో ఒక నాయకుడిని, ఆయన ఆశయాలను బంధించలేరని కాలం నిరూపించింది. రాజమండ్రి జైలు గోడల మధ్య ఆయన ఉన్న ప్రతి రోజు, బయట ప్రజల్లో ఆగ్రహ జ్వాల రగిలింది. జైల్లో ఎన్ని వేధింపులకు గురిచేసినా, ధైర్యం సడలని ఆ మహానాయకుడి పట్టుదలే ప్రజలకు కొండంత అండగా నిలిచింది. న్యాయస్థానాల్లో వాదనలు, వీధుల్లో ప్రజాపోరాటాలు ఒకటై అన్యాయంపై సమరం చేశాయి. ఆంధ్రప్రదేశ్ లోనే కాకుండా పొరుగు రాష్ట్రాలకు, విదేశాలకు నిరసన జ్వాలలు పాకాయి. అది చూసిన ప్రపంచం ఆ నాయకుడి గొప్పతనాన్ని మరోసారి గుర్తుచేసుకుంది.
అంతిమంగా నిజమే గెలిచింది. రాజ్యాంగబద్ధమైన న్యాయస్థానాలు ఆ కేసుల వెనుక ఉన్న అసలు రంగును గుర్తించి ఆయనకు విముక్తి ప్రసాదించాయి. ఐదు దశాబ్దాల ఆయన రాజకీయ జీవితంలో ప్రజలకు దూరంగా ఉన్నది లేదు. జైలు నుండి విడుదలైన ఆయనను చూసేందుకు రాజమండ్రి నుండి అమరావతి వరకు ప్రజలు బారులు తీరారు.
మధ్యాహ్నం మొదలైన ఆయన ప్రయాణం మరుసటి రోజు వరకు సాగిందంటే, ప్రజలు ఏ స్థాయిలో రోడ్లపైకి వచ్చారో అర్థం చేసుకోవచ్చు. ఆ అరెస్టుతో ఒక నాయకుడిని రాజకీయంగా, భౌతికంగా జైల్లో సమాధి చేయాలనుకున్న వారికి, ప్రజలే తమ తీర్పుతో కోలుకోలేని దెబ్బ కొట్టారు. కుట్రలు, కుతంత్రాలు తాత్కాలికంగా భయాన్ని కలిగించవచ్చేమో కానీ, నిజాయితీ, ప్రజాదరణ ముందు అన్యాయం ఎప్పుడూ తలవంచక తప్పదని ఈ ఘట్టం నిరూపించింది. నిజం గెలిచింది
