కాంగ్రెస్ పార్టీ రాష్ట్ర అధ్యక్షురాలు వై.ఎస్. షర్మిల రెడ్డి కేంద్రంలోని బీజేపీ ప్రభుత్వం ఉపాధి హామీ చట్టాన్ని బలహీనపరిచే ప్రయత్నం చేస్తోందని ఆరోపించారు. నెల్లూరు జిల్లా మనుబోలు మండలంలో జరిగిన ఉపాధి హామీ పరిరక్షణ యాత్రలో ఆమె ఈ వ్యాఖ్యలు చేశారు.
మనుబోలు మండలం అక్కంపేట గ్రామంలో జరిగిన ఈ యాత్రలో షర్మిల రెడ్డి మాట్లాడుతూ, పేదల సంక్షేమం కోసం వై.ఎస్. రాజశేఖర్ రెడ్డి ప్రవేశపెట్టిన పథకాలను బీజేపీ ప్రభుత్వం నిర్వీర్యం చేస్తోందని విమర్శించారు. ఉపాధి హామీ చట్టం ద్వారా పేద కూలీలకు ఉపాధి లభిస్తోందని, అయితే కేంద్ర ప్రభుత్వం నిధుల కేటాయింపులో కోతలు విధిస్తూ ఈ పథకాన్ని దెబ్బతీస్తోందని ఆమె ఆరోపించారు.
యువతకు ఉద్యోగాలు లభించని పరిస్థితి నెలకొందని, డిగ్రీ, పీజీలు చదివినవారు కూడా ఉపాధి కోసం ఇబ్బందులు పడుతున్నారని షర్మిల రెడ్డి పేర్కొన్నారు. కొత్త ఉపాధి చట్టానికి చంద్రబాబు, పవన్ కల్యాణ్, జగన్మోహన్ రెడ్డి మద్దతు ఇవ్వడం రాష్ట్ర ప్రజలకు తీరని అన్యాయం చేసిందని ఆమె అన్నారు. ఈ సందర్భంగా ఆమె దివంగత నేత వై.ఎస్. రాజశేఖర్ రెడ్డి విగ్రహాన్ని ఆవిష్కరించారు.
నెల్లూరు జిల్లా పీసీసీ అధ్యక్షుడు నారపరెడ్డి కిరణ్ కుమార్ రెడ్డి మాట్లాడుతూ, బీజేపీ ప్రభుత్వం ఉపాధి హామీ పని దినాలను పెంచుతామని చెప్పి, వాస్తవంగా తక్కువ రోజులు మాత్రమే పని కల్పిస్తూ ప్రజలను మోసం చేస్తోందని ఆరోపించారు. కేంద్రం రాష్ట్రాలపై నిధుల భారం మోపడం ద్వారా పథకాన్ని నిర్వీర్యం చేసే కుట్ర చేస్తోందని ఆయన అన్నారు. ఈ సందర్భంగా కిరణ్ కుమార్ రెడ్డి షర్మిల రెడ్డికి తన మద్దతు ప్రకటించారు.
ఈ కార్యక్రమంలో ఏఐసీసీ కన్వీనర్ గణేష్ కుమార్ యాదవ్, వర్కింగ్ ప్రెసిడెంట్ మస్తాన్ వలి, రాష్ట్ర ఉపాధ్యక్షులు కొడతా వెంకట్రావు యాదవ్, జిల్లా ఇంచార్జ్ గోపాల్ రెడ్డి, రాష్ట్ర ప్రధాన కార్యదర్శి పంట శ్రీనివాసులు రెడ్డి, నియోజకవర్గ సమన్వయకర్తలు, జిల్లా నాయకులు, కార్యకర్తలు పెద్ద సంఖ్యలో పాల్గొన్నారు.