చీరాల, 2026-08-22
ప్రభుత్వం కేటాయించిన అసైన్డ్ భూములను అక్రమంగా రిజిస్ట్రేషన్ చేయించుకున్న వారి నమోదులను రద్దు చేసి, అసలైన లబ్ధిదారుల పేర్లపై ఆన్లైన్లో నమోదు చేసి పట్టాదారు పాసుపుస్తకాలు మంజూరు చేయాలని కారంచేడు బాధితులు కోరారు. ఈ మేరకు వారు శనివారం చీరాల నియోజకవర్గ శాసనసభ్యులు మద్దులూరి మాలకొండయ్య ను కలిసి వినతిపత్రం సమర్పించారు.
ప్రభుత్వం కేటాయించిన అసైన్డ్ భూములను అక్రమంగా రిజిస్ట్రేషన్ చేయించుకున్న వారి నమోదులను రద్దు చేసి, అసలైన లబ్ధిదారుల పేర్లపై ఆన్లైన్లో నమోదు చేసి పట్టాదారు పాసుపుస్తకాలు మంజూరు చేయాలని కోరుతూ బాపట్ల జిల్లా చీరాల మండలం విజయనగర్ కాలనీకి చెందిన కారంచేడు బాధితులు శనివారం చీరాల నియోజకవర్గ శాసనసభ్యులు మద్దులూరి మాలకొండయ్య ను క్యాంపు కార్యాలయంలో కలిసి వినతిపత్రం సమర్పించారు.
భూముల కేటాయింపు వివరాలు
వినతిపత్రంలో వారు పేర్కొన్న వివరాల ప్రకారం, 1991లో ఎస్సీ కార్పొరేషన్, ఒంగోలు ద్వారా ల్యాండ్ పర్చేజ్ స్కీమ్ కింద కొత్తపాలెం సచివాలయ పరిధిలో ఒక్కొక్కరికి అర ఎకరం చొప్పున అసైన్డ్ భూమి కేటాయించారని తెలిపారు. అనంతరం ప్రభుత్వం భూములను 22-ఏ నిషేధిత జాబితా నుంచి తొలగించి ఫ్రీహోల్డ్గా ప్రకటించడంతో పాటు హక్కు పత్రాలు కూడా జారీ చేసిందని పేర్కొన్నారు. అయినప్పటికీ భూములు ఇప్పటికీ ఆన్లైన్లో నమోదు కాకపోవడంతో పట్టాదారు పాసుపుస్తకాలు అందక ప్రభుత్వ సంక్షేమ పథకాల ప్రయోజనాలు పొందలేకపోతున్నామని ఆవేదన వ్యక్తం చేశారు.
అక్రమ రిజిస్ట్రేషన్లపై ఆరోపణలు
ఆర్థిక ఇబ్బందుల కారణంగా సిర్రా నేతాజీ భగత్ సింగ్ అనే వ్యక్తి వద్ద కొంత డబ్బు అప్పుగా తీసుకున్న సమయంలో, తనఖా పేరుతో భూమి పత్రాలు తీసుకుని అనంతరం తమ అనుమతి లేకుండానే విక్రయ రిజిస్ట్రేషన్లు జరిగినట్లు ఎన్కంబ్రెన్స్ సర్టిఫికెట్లు (ఈసీలు) పరిశీలించగా తెలిసిందని ఆరోపించారు. తాము ఎప్పుడూ భూములు విక్రయించలేదని, రిజిస్ట్రేషన్ కార్యాలయానికి వెళ్లి అమ్మకపు పత్రాలపై సంతకాలు చేయలేదని స్పష్టం చేశారు.
భూముల్లోకి వెళ్లకుండా అడ్డుకుంటున్న వైనం
తమ భూములకు సంబంధించిన సర్వే నంబర్లలో ఇతరుల పేర్లు నమోదు కావడంతో పాటు, ఆ భూముల్లోకి వెళ్లకుండా అడ్డుకోవడం, బెదిరింపులకు పాల్పడుతున్నారని వినతిలో పేర్కొన్నారు. ఈ విషయాన్ని చీరాల తహసీల్దార్ దృష్టికి తీసుకెళ్లగా, అక్రమ రిజిస్ట్రేషన్లు రద్దు చేయించే అధికారం జిల్లా రిజిస్ట్రార్కు ఉందని, అవి రద్దు అయిన తర్వాత అసలైన లబ్ధిదారుల పేర్లపై ఆన్లైన్ నమోదు చేసి పట్టాదారు పాసుపుస్తకాలు జారీ చేసే చర్యలు తీసుకుంటామని తహసీల్దార్ హామీ ఇచ్చినట్లు తెలిపారు.
చర్యలు తీసుకోవాలని కోరారు
కాబట్టి ప్రభుత్వం తమకు కేటాయించిన అసైన్డ్ భూములకు సంబంధించిన అక్రమ రిజిస్ట్రేషన్లను రద్దు చేసి, అసలైన లబ్ధిదారుల పేర్లపై భూములను ఆన్లైన్లో నమోదు చేసి పూర్తి హక్కులు కల్పించేలా చర్యలు తీసుకోవాలని ఎమ్మెల్యే ను కారంచేడు బాధితులు కోరారు.
