ప్రపంచవ్యాప్తంగా 11 నుంచి 17 ఏళ్ల వయసున్న కౌమారదశ పిల్లల్లో ప్రతి నలుగురిలో ఒకరు వారంలో ఒక్కరోజు కూడా కనీసం 60 నిమిషాల శారీరక శ్రమ చేయడం లేదని ప్రపంచ ఆరోగ్య సంస్థ () తాజా అధ్యయనం వెల్లడించింది. 140 దేశాల్లో 32 లక్షల మందికి పైగా పిల్లలపై నిర్వహించిన సర్వేల ఆధారంగా ఈ నివేదిక రూపొందించారు.
ప్రపంచవ్యాప్తంగా 24.9 శాతం మంది టీనేజర్లు వారంలో ఒక్కరోజు కూడా 60 నిమిషాల వ్యాయామం చేయడం లేదు. బాలికల్లో 28 శాతం మంది, బాలురలో 22 శాతం మంది వారానికి కనీసం 60 నిమిషాల చురుకైన శారీరక శ్రమ చేయడం లేదు. ప్రతిరోజూ శారీరకంగా చురుకుగా ఉండే బాలికలు 11 శాతం మాత్రమే కాగా, బాలురలో ఈ సంఖ్య 17 శాతంగా ఉంది. టీనేజర్లు వారానికి సగటున 2.7 రోజులు మాత్రమే చురుకైన శారీరక శ్రమ చేస్తున్నారని అధ్యయనం తెలిపింది. కేవలం 14 శాతం మంది మాత్రమే వారంలోని ఏడు రోజులూ వ్యాయామం చేస్తున్నారు.
గత 15 ఏళ్లుగా పరిస్థితిలో మార్పు లేదు
గత 15 ఏళ్లుగా టీనేజర్లలో శారీరక శ్రమ స్థాయిలలో గణనీయమైన మార్పు కనిపించడం లేదని అధ్యయనం పేర్కొంది. 2030 నాటికి శారీరక నిష్క్రియాత్మకతను 15 శాతం తగ్గించాలనే ప్రపంచ లక్ష్యాన్ని ఇప్పటివరకు ఏ దేశమూ సాధించే దిశగా పయనించడం లేదని ఈ నివేదిక తెలిపింది.
బాలికల్లో వ్యాయామం తగ్గడానికి కారణాలు:
సురక్షితమైన ఆటస్థలాలు లేకపోవడం, సామాజిక ఆంక్షలు, క్రీడల్లో పాల్గొనే అవకాశాలు తక్కువగా ఉండటం, రవాణా సమస్యలు, వ్యక్తిగత భద్రతపై ఆందోళనలు బాలికల శారీరక చురుకుదనాన్ని ప్రభావితం చేస్తున్నాయని పరిశోధకులు పేర్కొన్నారు. మొబైల్ ఫోన్లు, ఇతర తెరల ముందు ఎక్కువ సమయం గడపడం కూడా ఒక కారణంగా భావిస్తున్నారు.
భారత్కు సంబంధించి కీలక అంశం:
ఈ అధ్యయనంలో భారత్కు సంబంధించిన జాతీయ స్థాయి ప్రాతినిధ్య డేటా అందుబాటులో లేకపోవడంతో దేశాన్ని విశ్లేషణలో చేర్చలేదు. దేశంలో టీనేజర్ల వ్యాయామ అలవాట్లపై విశ్వసనీయమైన గణాంకాలు అవసరమని నిపుణులు అభిప్రాయపడుతున్నారు.
శారీరక శ్రమ లేకపోవడం వల్ల భవిష్యత్తులో గుండె జబ్బులు, టైప్-2 మధుమేహం, కొన్ని రకాల క్యాన్సర్ల ముప్పు పెరిగే అవకాశం ఉందని అధ్యయనం హెచ్చరిస్తోంది. పాఠశాలల్లో క్రీడలు, వ్యాయామానికి ప్రాధాన్యం ఇవ్వడంతోపాటు బాలికలకు సురక్షితమైన ఆటస్థలాలు కల్పించాలని ప్రపంచ ఆరోగ్య సంస్థ సూచించింది.
