మాజీ ప్రధానమంత్రి, ప్రముఖ ఆర్థికవేత్త డాక్టర్ మన్మోహన్ సింగ్ స్మారకంగా హైదరాబాద్లో ఏర్పాటు చేసిన విగ్రహం, స్మారక పార్క్ను తెలంగాణ ముఖ్యమంత్రి ఎ. రేవంత్రెడ్డి న ఆవిష్కరించారు. హైదరాబాద్ ఫైనాన్షియల్ డిస్ట్రిక్ట్లోని గచ్చిబౌలి విప్రో జంక్షన్ వద్ద హెచ్ఎండీఏ ఆధ్వర్యంలో ఈ స్మారక పార్క్ను నిర్మించారు.
డాక్టర్ మన్మోహన్ సింగ్ జయంతిని పురస్కరించుకుని నిర్వహించిన ఈ కార్యక్రమంలో పలువురు మంత్రులు, ఎంపీలు, ఎమ్మెల్యేలు, అధికారులు, ప్రముఖులు పాల్గొన్నారు. సుప్రీంకోర్టు మాజీ ప్రధాన న్యాయమూర్తి జస్టిస్ ఎన్వీ రమణ, మాజీ న్యాయమూర్తి జస్టిస్ బి. సుదర్శన్రెడ్డి తదితరులు ఈ కార్యక్రమానికి హాజరయ్యారు.
ఈ సందర్భంగా సీఎం రేవంత్రెడ్డి మాట్లాడుతూ దేశ ఆర్థిక వ్యవస్థలో మన్మోహన్ సింగ్ కీలక పాత్ర పోషించారని పేర్కొన్నారు. 1991లో ఆర్థిక మంత్రిగా ఆయన చేపట్టిన ఆర్థిక సంస్కరణలు దేశ ఆర్థిక వ్యవస్థకు కొత్త దిశను చూపించాయని గుర్తుచేశారు.
అనంతరం ప్రధానమంత్రిగా పనిచేసిన సమయంలో విద్యా హక్కు, సమాచార హక్కు, గ్రామీణ ఉపాధి హామీ, ఆహార భద్రత తదితర రంగాల్లో ఆయన తీసుకొచ్చిన చట్టాలను సీఎం ప్రస్తావించారు.
తెలంగాణ ఏర్పాటు విషయంలోనూ మన్మోహన్ సింగ్ పాత్రను సీఎం ప్రస్తావించారు. రాష్ట్ర ఏర్పాటు బిల్లుపై అప్పటి ప్రధానమంత్రి మన్మోహన్ సింగ్ చేసిన సంతకాన్ని స్మారక పార్క్లో భద్రపరిచినట్లు తెలిపారు. తెలంగాణ రాష్ట్ర ఏర్పాటు కోసం సాగిన దీర్ఘకాల పోరాటానికి చివరి దశలో మన్మోహన్ సింగ్ ప్రధానమంత్రిగా ఉన్నారని పేర్కొన్నారు.
అలాగే డాక్టర్ మన్మోహన్ సింగ్కు మరణానంతరం భారతరత్న ఇవ్వాలని కేంద్ర ప్రభుత్వాన్ని సీఎం రేవంత్రెడ్డి కోరారు. ఢిల్లీలో ఆయన జ్ఞాపకార్థం ప్రత్యేక విజ్ఞాన కేంద్రాన్ని ఏర్పాటు చేయాలని కూడా విజ్ఞప్తి చేశారు. ఈ అంశాలను తెలంగాణ ఎంపీలు పార్లమెంట్లో ప్రస్తావించాలని సీఎం కోరారు.
ఫైనాన్షియల్ డిస్ట్రిక్ట్లో మన్మోహన్ సింగ్ విగ్రహాన్ని ఏర్పాటు చేయడం ద్వారా ఆయన ఆర్థిక విధానాలు, ప్రజాసేవ, దేశాభివృద్ధికి చేసిన కృషిని భవిష్యత్ తరాలకు గుర్తుచేసే అవకాశం ఉంటుందని ప్రభుత్వం తెలిపింది.
