ఇంకొల్లు మండలంలో రాబోయే పల్స్ పోలియో కార్యక్రమాన్ని సమర్థవంతంగా నిర్వహించేందుకు మండల టాస్క్ ఫోర్స్ కమిటీ సమావేశం జరిగింది. ఈ సమావేశంలో కార్యక్రమ కార్యాచరణ, లక్ష్యాలపై చర్చించారు.
ఇంకొల్లు, దుద్దుకూరు ప్రాథమిక ఆరోగ్య కేంద్రాల పరిధిలో నిర్వహించనున్న పల్స్ పోలియో కార్యక్రమానికి సంబంధించి మండల స్థాయి టాస్క్ ఫోర్స్ సమావేశం ఇంకొల్లు ఎంపీడీవో కార్యాలయంలో జరిగింది. వైద్య అధికారులు డాక్టర్ అంజలి, డాక్టర్ రాజేష్ ఈ సమావేశంలో కీలక వివరాలను వెల్లడించారు.
ఈ నెల 28, 29, 30 తేదీలలో మూడు రోజుల పాటు ఈ కార్యక్రమం కొనసాగుతుందని, మొదటి రోజు బూత్ల వద్ద, మిగిలిన రెండు రోజులు ఇంటింటికీ వెళ్లి పిల్లలకు పోలియో చుక్కలు వేస్తారని తెలిపారు. ఇంకొల్లు పీహెచ్సీ పరిధిలో 2150 మంది పిల్లలను లక్ష్యంగా చేసుకున్నారు.
ఇంకొల్లులో 15 పోలియో బూత్లు, ఒక ట్రాన్సిట్ బూత్, ఒక మొబైల్ టీంతో సహా మొత్తం 17 బృందాలు పనిచేస్తాయి. దుద్దుకూరు పీహెచ్సీ పరిధిలో 9 బూత్లు, ఒక మొబైల్ టీంతో మొత్తం 10 బృందాలు 1561 మంది పిల్లలకు చుక్కలు వేయనున్నాయి.
మండల ఎంపీడీవో శ్రీనివాసరావు అధ్యక్షతన జరిగిన ఈ సమావేశంలో వివిధ ఆరోగ్య, అంగన్వాడీ సిబ్బంది పాల్గొన్నారు. పోలియో నిర్మూలనలో భాగంగా ఈ కార్యక్రమాన్ని పకడ్బందీగా నిర్వహించాలని అధికారులు సూచించారు.
