కారంచేడు, 2026-11-21
బాపట్ల జిల్లా కారంచేడు మండలం కుంకులమర్రు సమీపంలో శనివారం సాయంత్రం జరిగిన రోడ్డు ప్రమాదంలో ఇనోవా కారు అదుపుతప్పి డివైడర్ను ఢీకొనడంతో ముగ్గురు మృతి చెందారు, ఎనిమిది మంది గాయపడ్డారు.
బాపట్ల జిల్లా కారంచేడు మండలం కుంకులమర్రు సమీపంలో శనివారం సాయంత్రం ఘోర రోడ్డు ప్రమాదం చోటుచేసుకుంది. జాతీయ రహదారిపై వేగంగా వెళ్తున్న ఇనోవా కారు అదుపుతప్పి డివైడర్ను ఢీకొనడంతో తీవ్ర విషాదం నెలకొంది. ఈ ప్రమాదంలో ఇద్దరు సంఘటనా స్థలంలోనే మృతి చెందగా, మార్గమధ్యంలో మరో చిన్నారి మృతి చెందింది. ప్రమాదంలో కారులో ప్రయాణిస్తున్న మరో ఎనిమిది మందికి తీవ్ర గాయాలయ్యాయి. క్షతగాత్రులను చికిత్స నిమిత్తం చీరాల ప్రభుత్వ ఆసుపత్రికి తరలించారు. ప్రమాద విషయం తెలుసుకున్న చీరాల శాసనసభ్యులు మద్దులూరి మాలకొండయ్య వెంటనే ఆసుపత్రికి చేరుకుని క్షతగాత్రులను పరామర్శించారు. వైద్యాధికారులతో మాట్లాడి బాధితులకు ఎలాంటి జాప్యం లేకుండా మెరుగైన వైద్యసేవలు అందించాలని ఆదేశించారు.
క్షతగాత్రుల పరిస్థితిని దృష్టిలో ఉంచుకుని మెరుగైన చికిత్స కోసం ఐదు అంబులెన్సుల ద్వారా వారిని గుంటూరు ప్రభుత్వ ఆసుపత్రికి తరలించే ఏర్పాట్లు చేశారు. ఈ సందర్భంగా గుంటూరు ఎమ్మెల్యే గల్లా మాధవితో ఫోన్లో మాట్లాడిన మద్దులూరి మాలకొండయ్య, ప్రమాద బాధితులకు మెరుగైన వైద్యం అందేలా చూడాలని కోరారు. ప్రమాదంలో మృతి చెందిన వారి కుటుంబ సభ్యులకు ఎమ్మెల్యే ప్రగాఢ సానుభూతి తెలియజేశారు. బాధిత కుటుంబాలను ప్రభుత్వం తరఫున ఆదుకుంటామని భరోసా ఇచ్చారు. ఈ ప్రమాదంతో కుంకులమర్రు పరిసర ప్రాంతాల్లో విషాదఛాయలు అలుముకున్నాయి.







