అవినీతి వార్తలు రాసిన జర్నలిస్టుపై పాశవిక దాడి.. హత్యాయత్నం కేసు నమోదు

ప్రకాశం జిల్లా పీసీ పల్లి వెలుగు కార్యాలయంలో సీసీ, పీవోల వసూళ్ల దందా, లోన్ల మంజూరులో జరుగుతున్న చేతివాటంపై గత రెండు రోజులుగా క్రౌన్ హ్యూమన్ రైట్స్ జాతీయ దినపత్రికలో వరుస పరిశోధనాత్మక కథనాలు ప్రచురితమయ్యాయి. ఈ కథనాలతో కక్షగట్టిన కొందరు దుండగులు, క్రౌన్ హ్యూమన్ రైట్స్ మార్కాపురం స్టాఫ్ రిపోర్టర్ నేలపాటి రవిపై గురువారం రాత్రి పథకం ప్రకారం కాపుకాచి కర్రలు, ఇనుప రాడ్లు, కత్తులతో విచక్షణారహితంగా దాడి చేశారు.

ఈ పాశవిక దాడిలో రవి తలకు బలమైన గాయాలు కావడంతో పాటు తీవ్ర రక్తస్రావమైంది. ప్రస్తుతం ఆయన స్థానిక ఆసుపత్రిలో అత్యవసర చికిత్స పొందుతున్నారు. దాడి సమయంలో దుండగులు విచక్షణారహితంగా కొడుతూ, భవిష్యత్తులో వెలుగు అవినీతిపై వార్తలు రాస్తే ప్రాణాలతో వదలబోమని, చంపేస్తామని తీవ్రంగా హెచ్చరించినట్లు బాధితుడు వెల్లడించారు.

అవినీతిని ప్రశ్నిస్తే వేటాడతారా

వెలుగు శాఖలోని అక్రమాలను ప్రశ్నిస్తూ వార్త రాసినందుకే ఈ దాడి జరిగిందని, దీని వెనుక పీసీ పల్లి వెలుగు అధికారుల ప్రేరేపణ, ప్రమేయం బలంగా ఉన్నాయన్న ఆరోపణలు వ్యక్తమవుతున్నాయి. ప్రజాస్వామ్యంలో నాల్గవ స్తంభమైన పత్రికా రంగాన్ని భయభ్రాంతులకు గురిచేసి, అవినీతిని కప్పిపుచ్చుకోవాలని చూడటం హేయమైన చర్య.

క్రౌన్ హ్యూమన్ రైట్స్ డిమాండ్లు:

రిపోర్టర్ నేలపాటి రవిపై దాడికి పాల్పడిన నిందితులను తక్షణమే గుర్తించి, నాన్-బెయిలబుల్ సెక్షన్ల కింద అరెస్ట్ చేయాలి. దాడి వెనుక ఉన్నట్లు ఆరోపణలు ఎదుర్కొంటున్న పీసీ పల్లి వెలుగు అధికారుల పాత్రపై సమగ్ర, నిష్పాక్షిక విచారణ జరిపి, తగిన చర్యలు తీసుకోవాలి. బాధిత జర్నలిస్టుకు, ఆయన కుటుంబానికి ప్రభుత్వం తక్షణమే పూర్తి రక్షణ కల్పించాలి. విధి నిర్వహణలో ఉన్న జర్నలిస్టులకు తగిన భద్రత కల్పించేలా ఉన్నతాధికారులు కఠిన చర్యలు తీసుకోవాలి.

జర్నలిస్టుల స్వేచ్ఛను హరించేలా సాగే భౌతిక దాడులను ఎట్టి పరిస్థితుల్లోనూ సహించేది లేదని, బాధిత రిపోర్టర్కు న్యాయం జరిగే వరకు చట్టపరంగా, ప్రజాస్వామ్యబద్ధంగా పోరాడతామని క్రౌన్ హ్యూమన్ రైట్స్ యాజమాన్యం స్పష్టం చేసింది.